A Leiteira 2015

Xa estamos ultimando a nova 'leiteira', o almanaque que todos os anos facemos dende a Coordinadora comarcal de Equipos de Normalización Lingüística. Eis a súa parte superior.

Literatura para comer

Coincidindo coa celebración do samaín, a quinta feira pasada (30 de outubro), fixemos unha actividade que non resultou nada indixesta.

Esta consistiu na elaboración, por parte de alumnado de 2º da ESO, dalgunhas das moitas receitas de cociña contidas no libro de Ledicia Costas, Escarlatina, a cociñeira defunta, unha das lecturas optativas que algunhas e algúns estamos a ler.

O resultado, ao final, resultou moi gorentoso, como podedes ver!

Coa Mesa pola Normalización Lingüística no noso centro

O 16 de outubro Marcos Maceira, presidente d’A Mesa pola Normalización Lingüística, visitou o noso centro. No encontro que realizou con nós, as alumnas e alumnos da Baixa Limia, o tema da súa intervención foron os prexuízos lingüísticos.

No remate do encontro realizámoslle preguntas, das cales o que segue é unha mostra.

Que discriminación cara á nosa lingua che resultou mais sorprendente?

Lembro unha historia dun home do Carballiño que chamou (falando galego) a unha compañía de luz e o operario lle dixo que non o entendía e se lle podía falar ou castelán ou inglés. Ao final resultou que estaba chamando a Salamanca; pero, a compañía, ao subministrarlle a luz ao Carballiño, tiña que poder atender en galego. Por todo o acontecido tanto el coma nós reclamamos.

Persoalmente un día chamei unha empresa que me tiña que enviar un paquete. Faleille en galego e contestáronme que se non lle falaba en castelán non me entregaban o pedido. Eu naturalmente quedei pasmado.

Ambas son discriminacións nada boas para o galego.

Que che levou a presidir a Mesa pola Normalización Lingüística?

Elixíronme todos os meus compañeiros e compañeiras.

Superaranse todos estes prexuízos algún dia?

Eu agardo que si, pero fará falta compromiso por parte do goberno galego e o español. Ademais tamén dependerá de nós mesmos, da sociedade galega, que non nos podemos ver inferiores ás demais sociedades do mundo.

Cal dos prexuízos pensas que é o peor para a lingua?

Todos son malos. Pero  sen dúbida o peor é que consideremos o galego como unha lingua menos válida que as demais. Xa que moita xente pensa que só polo feito de sermos galegos somos inferiores a outros pobos, e para resolver isto o que fan é mudar a súa lingua, falando castelán, o que aínda é peor.

Non podemos pensar que somos inferiores ou superiores, porque todos temos dúas pernas, unha cabeza, un cerebro… É dicir, todos somos iguais.

Cantos anos leva vostede defendendo o galego?

Levo moitos, máis de 20 anos defendendo o idioma galego.

Que opina vostede do trilingüismo que se intenta impoñer na educación?

Non teño nada en contra, coido que o ideal seria coñecer moitas linguas, pero penso que intentan facelo para sacar o idioma galego do ensino, poñendo o inglés como excusa.

Que papel ten o goberno galego en que o noso idioma segundo os datos do Instituto Galego de Estatística (IGE) non sexa hoxe xa o idioma máis falado pola poboación?

O peor prexuízo é que nós consideremos a lingua inferior, xa que non só consideramos inferior a nosa lingua , senón tamén a nós mesmos. Nós non cremos que temos as mesmas capacidades de desenvolvemento coa nosa lingua como con outras e por iso cambiamos de lingua. Nós somos iguais que os demais, empreguemos a lingua que empreguemos.

O que se debería facer dende o goberno galego (e non se fai) é promover o noso idioma dende todas as instancias posíbeis: cultura, medios de comunicación, empresa, xustiza...

Podería darme un argumento para combater o prexuízo de que o galego fóra de aquí non serve para nada?

Vale exactamente igual que calquera outra lingua, xa que nos serve para comunicarnos dentro do mesmo territorio. Ademais temos a vantaxe de que a nosa lingua e o portugués tamén teñen a mesma orixe e podemos comunicarnos polo mundo través dela sen ningún problema.

De onde cre que sae a falsa idea de relacionar o galego coa pobreza e o atraso?

Débese a que, logo da etapa de enorme prestixio que durante a Idade Media acadou o galego, se nos impuxo o castelán. E as clases dirixentes, traídas de fóra de Galiza, non o falaban.

En que afecta a LOMCE  ao galego?

Intenta potenciar o castelán e a LOMCE daralle un 100% dos estudos aos rapaces que queiran descoñecer a súa lingua propia.

É do Depor ou do Celta?

Do Celta.

Se persisten estes prexuízos durante moito tempo, que ocorrerá coa lingua galega?

Moitos prexuízos non son de agora e non se sabe o que pasará nun futuro. Así como moitos prexuízos está empezando a desaparecer, outros están empezando a reavivarse. Se os galegos deixamos de usar a nosa lingua desapareceremos como pobo.

Estrada nacional ou autopista de peaxe?

Depende, todo tipo de peaxe deberase suprimir.

Reflexione sobre o feito de que aos nenos de hoxe en día se lles corte o dereito de aprender a lingua propia, o galego.

Temos que tentar que os nenos aprendan a súa lingua propia, o galego, xa que teñen ese dereito.

Noite de Luar

O 10 de outubro Maite López, estudante de 1º de Bacharelato, participou no concurso de Recantos do Luar (TVG). Un grupo de compañeiras e compañeiros —e mesmo algún profe— acompañámola esa noite ao programa.

Xa superou a primeira fase do concurso. Así que agora tócalle seguir interpretando novos temas con esa voz marabillosa que ten na televisión. E nós seguirémola a acompañar!

Tíralle da Lingua